Jóhann Berg Guðmundsson lék með íslenska landsliðinu í kvöld er liðið vann 2-0 sigur á Andorra í undankeppni EM.
Ísland spilaði vel á köflum í kvöld en Andorra getur verið sterkt heima fyrir og er oft erfitt að heimsækja liðið.
Jói Berg viðurkennir að það hafi oft verið erfitt að spila við liðið í kvöld en þeir hikuðu ekki við að láta sig falla við minnstu snertingu.
,,Auðvitað erum við búnir að bíða lengi eftir sigrinum en þetta er ný keppni og það var mikilvægt að byrja á þremur punktum sem við gerðum,“ sagði Jói Berg.
,,Við vissum að þetta yrði smá basl og þetta var það en þetta fyrsta mark gerði okkur auðveldara fyrir.“
,,Á tímum var maður alveg að fara að snappa. Þetta er ótrúlega skrítin spilamennska, það má varla snerta þá og þá eru þeir komnir í jörðina.“
,,Þeir eru góðir í föstum leikatriðum svo það var erfitt að stoppa þá í því en við gerðum okkar besta og 2-0 sigur hér er mjög gott.“
,,Við vorum rólegir og vissum það að ef við myndum spila okkar leik myndum við vinna þennan leik og við gerðum það. Auðvitað var þetta smá basl en eftir fyrsta markið var ég viss um að við myndum vinna.“
,,Þessi leikur var sá mikilvægasti af þessum tveimur leikjum og við vitum að úti gegn Frökkum verður erfitt en við höfum náð í punkta gegn erfiðum liðum á útivelli áður.“
