Hörður Snævar Jónsson skrifar frá Andorra:

Íslenska landsliðið hefur leik í undankeppni Evrópumótsins, í kvöld. Liðið mætir þá Andorra klukkan 19:45. Leikurinn verður afar áhugaverður.

Andorra er ekki hátt skrifað lið en hefur náð góðum úrslitum á heimavelli, liðið pakkar í vörn og beitir öllum helstu brögðum til að kreista fram úrslit. Íslenska liðið gæti þurft að sýna mikla þolinmæði.

Leikurinn fer fram á gervigrasvelli í Andorra en liðin hafa mæst fimm sinnum áður, þar hefur Ísland unnið alla leikina.

Andorra hefur ekki skorað mark, leikirnir eru fimm en fyrsti leikurinn var árið 1999. Þá voru liðin samn í undankeppni EM og vann Ísland þá 2-0 og 3-0 sigur.

Birkir Már Sævarsson, bakvörður liðsins verður á sínum stað í varnarlínunni og mun þá leika sinn 89 landsleik fyrir Íslands.

Hann mun því taka fram úr Eiði Smára Guðjohnsen sem lék 88 leiki og jafna Hermann Hreiðarsson sem lék 89 landsleiki. Þeir verða í öðru sæti saman en Birkir mun svo líklega slá það met á mánudag gegn Frakklandi.

Rúnar Kristinsson er leikjahæsti landsliðsmaður í sögu Íslands með 104 landsleiki. Móðir Birkis, Helga skrifaði um þetta afrek hans á Twitter. ,,Ég á’ann og alltaf jafn stolt,“ sagði Helga sem má svo sannarlega vera stolt af syni sínum.

Ég á’ann og alltaf jafn stolt ? https://t.co/5XwPF0cc99

— Helga Birkisdóttir (@helgabirkis) March 22, 2019