Richard Keys, sparkspekingur beIN Sports, hefur hraunað yfir knattspyrnustjórann Harry Redknapp.

Redknapp hefur komið víða við á ferlinum en var síðast þjálfari Birmingham City í næst efstu deild.

Birmingham er í fjárhagsvandræðum þessa stundina og gæti misst 12 stig í deildinni eftir að hafa brotið fjárlög FFP [Financial Fair Play].

Redknapp fékk nokkra dýra leikmenn til Birmingham árið 2017 en hann entist aðeins í nokkra mánuði hjá félaginu.

Keys kennir Redknapp um vandræði félagsins og vonar að hann sé búinn að leggja þjálfarabókina á hilluna endanlega.

,,Þetta er sami helvítis kallinn sem eyðilagði Queens Park Rangers, Portsmouth og West Ham,“ sagði Keys.

,,Hann hefði gert það hjá Tottenham ef Daniel Levy hefði ekki stöðvað það. Við skulum vona það að hann sé hættur fyrir fullt og allt og geti ekki skaðað fleiri félög.“