Hörður Snævar Jónssons skrifar frá Peralada á Spáni:

Íslenska landsliðið æfði í annað sinn í Katalóníu nú í morgun en leikmenn liðsins komu saman í gær. Undirbúningur fyrir undankeppni EM er í fullum gangi.

Liðið æfir í Peralada á Spáni í dag og á morgun og heldur síðan til Andorra snemma á fimmtudag, þar er leikur gegn heimamönnum á föstudag.

Alfreð Finnbogason er einn af þeim sem er í hópnum, hann er mættur aftur eftir meiðsli. Alfreð snéi til baka um liðna helgi með Augsburg og er mættur í verkefni landsliðsins.

Lífið utan vallar hefur líka breyst hjá framherjanum, hann og unnusta hans, eiga nú saman tvö börn. Alfreð segir lífið með tvö börn ganga vel.

,,Það er smá breyting, það er aðeins minni svefn,“ sagði Alfreð sem þakkar fyrir skilninginn sem unnusta hans, hefur á starfi hans sem atvinnumaður í fótbolta.

,,Ég er með gríðarlega skilningsríka konu, sem sýnir því skilning að ég þurfi stundum að sofa, sem íþróttamaður. Það er allt í toppstandi, það er aðeins minni svefn,“ sagði Alfreð léttur.

Alfreð deilir herbergi með Jóhanni Berg Guðmundssyni sem einnig er faðir, þeir félagar reyna því að sofa mikið.

,,Það er hrikalega gott að koma og hitta strákana, ég og Jóhann Berg höfum gott af því að fá góðan svefn.“