Hörður Snævar Jónsson skrifar frá Peralada á Spáni:

,,Það er gott að komast í góðar aðstæður, komast í góðan hita og gott að koma saman aftur eftir langan tíma,“ sagði Birkir Bjarnason við fréttamann á æfingu landsliðsins á Spáni í dag.

Liðið kom saman í dag og hefur hafið undirbúning sinn fyrir undankeppni EM, liðið mætir Andorra á föstudag og síðan Frakklandi eftir viku.

Birkir er straðráðinn í því að koma liðinu á þriðja stórmótið í röð.

,,Ég lít bara vel á þessa undankeppni, þetta eru góð og reynd lið, lið sem þekkjum lítið en nokkur sem við þekkjum mjög vel. Við eigum að góðan möguleika á að ná einu af tveimur efstu sætunum

Andorra spilar fremur leiðinlegan fótbolta ef svo má að orði komast, reyna að tefja mikið og sparka duglega í andstæðinga sína.

,,Við erum búnir að heyra það og sjá, þeir eru með ýmis brögð. Við verðum að undirbúa okkur undir það, við erum með mjög reyndan hóp og flestir af okkur hafa spilað á móti svona liði og aðstæður.“

,,Ég held að enginn vilji spila á gervigrasi, þetta er aðstæðan og við verðum að vera klárir í það. Við erum flestir sem höfum spilað gegn svona liði og fengið að finna fyrir því, það verður ekkert erfitt fyrir okkur að að vera klárir.“

,,Við erum alls ekki ánægðir með 2018, við ætlum okkur að sýna það að við séum betri en það, ná góðum úrslitum.“

Viðtalið við Birki er í heild hér að neðan.