Ástríðan í gríska fótboltanum er oft of mikil en stuðningsmenn þar í landi eiga það til að missa stjórn á sér.

Stærsti leikurinn þar í landi er viðureign Panathinaikos og Olympiakos en rígurinn er risastór þar á milli.

Leikur gærdagsins var stöðvaður eftir 70 mínútur en leikið var á Olympic vellinum í Aþenu.

Staðan var 1-0 fyrir Olympiakos er flautað var af en stuðningsmenn Panathinaikos reyndu að ráðast á varamannabekk gestaliðsins.

Eftir aðeins fimm mínútur reyndu stuðningsmenn Panathinaikos að komast að leikmönnum Olympiakos en leik var þó haldið áfram.

Í síðari hálfleik byrjuðu slagsmál á milli stuðningsmanna og lögreglu og var táragas notað til að stöðva lætin.

Marco Fritz, dómari leiksins, ákvað þá að kalla þetta gott og flautaði leikinn af er 20 mínútur voru eftir.

,,Þetta er hræðilegt, ég get ekki útskýrt þetta. Að komast inn á völlinn.. Að elta okkar leikmenn.. Ég á engin orð,“ sagði Kostas Fortounis, leikmaður Olympiakos.

,,Eftir markið okkar þá byrjuðu þeir að hópast inn á völlinn. Við gátum ekki haldið áfram. Þeirra leikmenn reyndu að róa þá en þeir voru ekki rólegir.“