Það var sett heimsmet í kvennaboltanum í dag er lið Atletico Madrid og Barcelona áttust við á Spáni.
Leikið var á Wanda Metropolitano vellinum en það er heimavöllur Atletico og hefur verið síðan 2017.
Sá völlur tekur 68 þúsund manns í sæti en 60,739 manns gerðu sér leið á völlinn til að horfa á viðureign dagsins.
Kvennalið Atletico spilar leiki sína vanalega á æfingasvæðinu en margir óskuðu eftir miða og var viðureignin því færð.
Um er að ræða tvö efstu lið spænsku kvennadeildarinnar en Barcelona vann 2-0 og er nú þremur stigum á eftir Atletico er sex leikir eru eftir.
Spænski kvennaboltinn er á mikilli uppleið en 48,121 manns sáu leik Athletic Bilbao gegn Atletico á San Mames í síðasta mánuði.
Heimsmetið gildir aðeins um leiki félagsliða en 90,185 manns mættu á úrslitaleik HM 1999 á milli Bandaríkjanna og Kína.