Victor Lindelof, leikmaður Manchester United, hafnaði því að vera partur af sænska landsliðinu fyrir komandi verkefni.

Svíþjóð hefur leik í undankeppni EM eins og aðrar þjóðir í næstu viku en liðið leikur við Rúmeníu og Noreg.

Lindelof hefur verið fastamaður í liðinu undanfarin ár en hann hefur einnig staðið sig vel með United síðustu vikur.

Lindelof er 24 ára gamall en hann og eiginkona hans Maja Nilsson eiga von á sínu fyrsta barni.

Maja á að eiga í byrjun apríl og hefur Lindelof ákveðið að neita að taka þátt í verkefninu svo hann geti sinnt eiginkonu sinni.

Samkvæmt sænskum miðlum þá tók Janne Andersson, landsliðsþjálfari Svía, vel í fréttirnar og skilur ákvörðun Lindelof.