Wojciech Szczesny, markvörður Juventus, er góðvinur Jack Wilshere sem spilar í dag með West Ham.

Wilshere og Szczesny voru lengi saman hjá Arsenal en sá fyrrnefndi yfirgaf félagið á síðasta ári eftir þrálát meiðsli.

Szczesny segir skemmtilega sögu af vini sínum og talar einnig afar vel um hæfileikana sem hann býr yfir.

,,Hann er besti vinur minn ásamt Grzegorz Krychowiak,“ sagði Szczesny við YouTube rásina Foot Truck.

,,Í brúðkaupinu mínu þá varð hann svo fullur. Við leituðum að honum út um allt í tvo tíma. Svo fundum við hann sofandi í runna!“

,,Hann hefur glímt við meiðsli sem hann hefur aldrei jafnað sig af. Svo meiðist hann aftur vegna þess og svo enn og aftur.“

,,Hann er einn hæfileikaríkasti leikmaður sem ég hef séð. Vegna meiðslanna spilar hann með West Ham frekar en stórliði í Evrópu.“