Logi Einarsson, formaður Samfylkingarinnar sem situr í stjórnarandstöðu á Alþingi, virðist ekki vera vel að sér í knattspyrnufræðunum. Logi birti færslu á Twitter í gær, sem hann eyddi síðan út.

Þar var Logi að gagnrýna Bjarna Benediktsson, formann Sjálfstæðisflokksins sem er lang stærsti flokkurinn á þingi. Logi var að gagnrýna Bjarna fyrir að láta Þórdísi Kolbrúnu Reykfjörð taka tímabundið við, sem dómsmálaráðherra.

Fyrir er Þórdís iðnaðar og nýsköpunarráðherra og sinnir nú tveimur verkefnum í ríkisstjórn. Þórdís varð dómsmálaráðherra eftir að Sigríður Andersen steig til hliðar fyrr í vikunni.

,,Ef Bjarni Ben stýrði Stjörnunni í fótbolta og bakvörðurinn væri rekinn útaf, léti hann framherjann líklega bæta við sig bakverðinum og hvíldi bekkinn.  – Skilvirk stjórnun?,“ skrifaði Logi.

Hann hefur líklega ekki áttað sig á því að þegar einstaklingur er rekinn af velli í knattspyrnu, þá kemur enginn inn í hans stað. Lið spilar þá manni færri, Sigurgeir Jónasson bendir á þetta. Ólíkt í stjórnmálum þegar einhver er „rekinn“ af velli, þá kemur einstaklingur í hans stað.

,,Ef þú ætlar að taka (frekar skrítna?) fótboltasamlíkingu á þetta mál, þá er allavega betra að þekkja fótboltareglurnar. Ef bakvörðurinn er rekinn út af þá kemur engin af bekknum inná,“ skrifar Sigurgeir en Logi hefur síðan eytt færslunni sem sjá má hér að neðan.