Þorkell Máni Pétursson, útvarpsmaður og umboðsmaður er í áhugaverðu viðtali í Fréttablaðinu í dag.

Máni er markþjálfari og gagnrýnir hvernig kerfið hér á landi kemur fram við stráka.

,,Mín reynsla af því að vinna með unga menn er að þá vantar oft stefnu og tilgang. Skólakerfið á að rækta það sem þeir eru góðir í. Þjóðverjar eru góðir í þessu. Við sjáum það að þegar drengir með einhverjar raskanir, sem kallaðir eru öðruvísi, fá áhuga á einhverju þá eru þeir afbragðsgóðir í því,“ sagði Máni í samtali við stjörnublaðamanninn, Ara Brynjólfsson.

Máni segir að íslenskir landsliðsmenn í fótbolta hafi sína bresti.

„Ég held að ég geti fullyrt að hálft A-landslið karla í fótbolta sé ofvirkt eða með athyglisbrest.“

Hann segir að þeir sem passi ekki inn í þann kassa sem fólk á að fara í, skari oft fram úr í íþróttum og listum.