Aaron Lennon er kominn á betri stað eftir að hafa reynt að taka líf sitt fyrir rúmum tveimur árum. Lennon var langt niðri en vandamál hans hafði þróast yfir langt skeið.

Lennon hefur verið atvinnumaður í fótbolta í fleiri ár og þénað vel, hann segir að fólk hafi verið hissa á að maður í hans stöðu væri að glíma við þunglyndi.

,,Ég hef rætt við nokkra leikmenn, ég ætla ekki að nefna þá en þeir vildu vita hvað ég gekk í gegnum, ég gaf þeim ráð,“ sagði Lennon sem er í dag liðsfélagi Jóhanns Berg Guðmundssonar í Burnley.

Lennon ráðleggur fólki að leita sér hjálpar en hann hélt alltaf að hann þyrfti ekki hjálp frá öðrum og lokaði sig af.

,,Ef einhverjum líður illa þá eiga þeir svo sannarlega að leita sér hjálpar, fólk var hissa að maður í starfi eins og ég væri að glíma við andleg vandamál.“

,,Hjá mér var þetta alltaf að aukast, ég áttaði mig ekki á þessu fyrr en það var of seint. Þetta gerðist yfir langan tíma, fjölskyldan var að spyrja mig hvort allt væri í lag og ég sagi að svo væri.“

,,Þú ferð að að einangra þig, ég hef aldrei verið týpan sem biður um hjálp. Það erfiðasta fyrir mig var að opna mig og segja frá vandamálunum. Tíminn kom þegar ég þurfti hjálp, sem betur fékk ég hjálp.“