Hallgrímur Mar Steingrímsson, kantmaður KA virðist vera yfir meðallagi myndarlegur en í annað sinn eru myndir hans notaðar á Tinder.

Þar eru tveir menn að sigla fölsku flaggi á þessu stefnumótarforriti og reyna að heilla stelpur með myndum af Hallgrími.

Hallgrímur sagði frá málinu á Instagram síðu sinni en Fótbolti.net fjallar meira um málið og ræðir við hann.

Kærasta Hallgríms er ósátt með þetta. ,,Þú sem ert að nota myndirnar hans Hallgríms á Tinder (það er líka einn annar í Danmörku) mátt gjöra svo vel og hætta því. Það er mjög auðvelt að fara með þetta lengra og komast að því hver þú ert. Hversu pathetic?,“ skrifar Mía Svavarsdóttir kærasta Hallgríms.

„Þetta er mjög steikt. Ég fékk bara send skilaboð í gær frá vinkonu kærustu minnar, þar sem hún sendir mér mynd af Tinder aðgang á nafninu Aron, 18 ára strák frá Grindavík, eða hann gefur sig allavega út fyrir að heita Aron og vera 18 ára. Það vill svo til að gæinn er með mynd af mér,“ sagði Hallgrímur um málið við Fótbolta.net.

Hallgrímur segir að þetta sé önnur ábendingin um svona mál en danskur strákur hafði notað myndir af sér.

„Hann hefur farið inná Instagram síðuna mína og náð í einhverja mynd sem honum hefur litist ágætlega á. Það er spurning hver tilgangurinn sé með þessu.“