Hlaðvarpsþátturinn, 90 mínútur hefur hafið göngu sína en um er að ræða þátt sem Hörður Snævar Jónsson, ritstjóri 433.is stýrir.

Rætt verður um fótbolta við áhugaverða gesti í vetur, farið verður um víðan völl.

Gestur þáttarins að þessu sinni er Garðar Gunnlaugsson sem ólst upp á Akranesi, gríðarleg pressa var á honum frá unga aldri enda bræður hans hetjur á Akranesi, Arnar og Bjarki.

Garðar upplifði slæmt tímabil með ÍA sumarið 2017 er liðið féll úr efstu deild. Framherjinn var mikið meiddur og ekki í sínu besta standi.

Hann lenti í hræðilegu atviki í leik gegn Leikni á því tímabili er annað eistað á honum sprakk eftir spark frá Brynjari Hlöðverssyni.

Vonbrigðasumar varð ekki betra eftir þessi óhugnanlegu meiðsli en Garðar kláraði samt sem áður leikinn í bikarnum með sprungið eista.

,,Þetta voru vonbrigði. Bæði fyrir mig persónulega og fyrir liðið. Ég meiðist rétt fyrir mót og lendi svo í því að fá þrisvar lungnabólgu yfir sumarið plús sprungið eista!“ sagði Garðar.

,,Þar er ég einmitt í þessari varnarvinnu sem ég talaði um áðan. Þar er Brynjar Hlöðversson að fara að skjóta fyrir utan teig hjá okkur. Þetta er í bikarleik gegn þeim [Leikni Reykjavík].“

,,Ég næ að stela boltanum af honum, rétt áður en hann skýtur. Hann sveiflar löppinni af fullum krafti upp í minn viðkvæmasta part.“

,,Ég hníg niður og gleymi því ekki að dómarinn kemur að mér og spyr hvort hann eigi að kalla á sjúkraþjálfarann. Ég segi við hann: ‘hvað í andskotanum á sjúkraþjálfarinn að gera í þessu? Á hann að spreyja einhverju á punginn á mér?’

Eins og greint var frá þá ákvað Garðar að klára leikinn en þurfti svo fljótt að fara í aðgerð því sársaukinn var gríðarlegur.

,,Ég harkaði þetta af mér og klára leikinn. Þarna var töluvert eftir af leiknum. Ég skoraði úr víti og við jöfnum. Svo tek ég framlenginguna líka.“

,,Eftir leikinn þegar ég kem inn í klefa þá fer ég að skoða áverkana og fæ nett áfall því pungurinn á mér basically bara svartur og fjórfaldur. Hann er að pumpa inn blóði þarna.“

,,Ég er settur í bráðaaðgerð daginn eftir þar sem eistað á mér er saumað saman. Þetta var örugglega versti sársauki sem ég hef fundið á ævinni. Flestir karlmenn sem hafa fengið létt bank þarna niðri geta tengt við það en þetta var aðeins meira. Það bara tekinn gamli skólinn á þetta og reima buxurnar aðeins fastar.“