Real Madrid er úr leik í Meistaradeild Evrópu eftir leik við hollenska stórveldið Ajax í gær.

Seinni leikur liðanna fór fram í gær í Madrid en Real vann fyrri leikinn 2-1 á Amsterdam Arena.

Liðið var því í góðri stöðu fyrir leik gærdagsins eftir að hafa skorað tvö mörk á útivelli.

Ajax hafði þó engan áhuga á að kveðja svo snemma og gerði sér lítið fyrir og vann 4-1 sigur á Santiago Bernabeu. Dusan Tadic, fyrrum leikmaður Southampton, átti stórleik og lagði upp tvö mörk og skoraði eitt í sigrinum.

Real Madrid hafði unnið Meistaradeildina fjórum sinnum á síðustu fimm árum, stórveldið er fallið. Ajax er lítið félag í samanburði við Real Madrid, þannig þénar einn leikmaður Real Madrid meira á einu ári en allir starfsmenn Ajax.

,,Ég hef 28 milljónir evra á ári í kostnað, það er fyrir aðalliðið, varaliðið og unglingaliðin okkar,“ sagði Marc Overmars, yfirmaður knattspyrnumála hjá Ajax.

,,Það er ögn minna en Gareth Bale fær í laun hjá Real Madrid á ári, Real Madrid er með 630 milljónir evra á ári í kostnað. Við náum því aldrei, það sem Real borgar einum leikmanni er það sem við notum í alla starfsmenn og leikmenn okkar.“