Íslenska kvennalandsliðið þurfti að sætta sig við ansi stórt tap á Algarve mótinu á Spáni í gær. Ísland þurfti á sigri að halda til að eiga möguleika á verðlaunum á mótinu en tap varð niðurstaðan.
Andstæðingur liðsins var Skotland en stelpurnar okkar töpuðu með fjórum mörkum gegn einu. Eina mark Íslands gerði Sara Björk Gunnarsdóttir þegar 13 mínútur voru búnar af seinni hálfleik.
Víðir Sigurðsson, einn af reyndari blaðamönnum þjóðarinnar hefur áhyggjur af þeirri stöðu sem íslenska kvennalandsliðið er í.
,,Óhætt er að segja án þess að taka stórt upp í sig að frammistaða íslenska kvennalandsliðsins í knattspyrnu gegn Skotum í Algarve-bikarnum í Portúgal í gær hafi ekki verið neitt sérstök. Skotar unnu afar öruggan sigur, 4:1, og hann hefði jafnvel getað verið stærri miðað við gang mála en skoska liðið var mun betri aðilinn megnið af leiktímanum,“ skrifar Víðir á netmiðlinum, mbl.is.
Jón Þór Hauksson tók við þjálfun liðsins og telur Víðir að þessi úrslit muni hringja viðvörunarbjöllum.
,,Það er áhyggjuefni að íslenska liðið skuli vera að dragast aftur úr Skotum, eins og þessi leikur bar vitni um. Skoska liðið var einfaldlega betra, samstilltara, kraftmeira og miklu öruggara með boltann en það íslenska. Miðað við leiki Íslands og Skotlands undanfarin ár, þar sem Ísland hefur frekar haft yfirhöndina, þá hlýtur það að hringja viðvörunarbjöllum þegar þær skosku vinna jafn auðveldan sigur og raun bar vitni í gær. Jafnvel þó þær séu að búa sig undir HM í sumar en íslenska liðið sé að búa sig undir undankeppni EM sem hefst í haust. Það á ekki að afsaka þann mun sem var á þessum tveimur liðum í gær.“
Ísland leikur um níunda sæti á mótinu gegn Portúgal á morgun.