Hlaðvarpsþátturinn, 90 mínútur hefur hafið göngu sína en um er að ræða þátt sem Hörður Snævar Jónsson, ritstjóri 433.is stýrir.

Rætt verður um fótbolta við áhugaverða gesti í vetur, farið verður um víðan völl.

Gestur þáttarins að þessu sinni er Sigurbjörn Hreiðarsson, hann er litríkur karakter sem á ansi merkilegan feril, hann lék alla tíð í meistaraflokki með Val, fyrir utan eitt tímabil í atvinnumennsku. Sigurbjörn upplifði ótrúlega tíma með Val, bæði góða og slæma.

Sigurbjörn var hluti af liði Vals árið 2001 er liðið féll úr Símadeildinni eða efstu deild í fyrsta skiptið.

Valur er besta lið landsins í dag en var í mikilli lægð á þessum tíma og voru erfiðleikar innan sem utan vallar.

Sigurbjörn viðurkennir að það hafi verið erfitt að kyngja þessu falli en hann var svo sjálfur farinn í atvinnumennsku stuttu seinna.

,,Það var ömurlegt. Þetta var geysilega ömurlegt, að fara niður,“ sagði Sigurbjörn.

,,Maður hugsaði bara: ‘á maður þátt í þessu bulli maður. Hvað í fjandanum er þetta maður!’

,,Þetta var ekki gott en eins og ég segi þá voru mikið af breytingum í liðinu ár eftir ár. Það voru erfiðleikar í klúbbnum.“

,,Fótboltahliðin karla megin, það var ládeyða. Það er bara eins og það er. Við sluppum í nokkur tímabil en svo kom þetta.“