Það hefur komið nokkrum á óvart hversu mikið miðjumaðurinn Matteo Guendouzi fær að spila hjá Arsenal.

Guendouzi er 19 ára gamall en hann kom til Arsenal frá Lorient í Frakklandi síðasta sumar.

Hann var óþekkt nafn áður en hann samdi við félagið og hefur spilað alls 33 leiki á þessu tímabili.

,,Verum hreinskilnir, fyrir utan þá sem fylgdust aðeins með franska boltanum þá hafði enginn heyrt um mig,“ sagði Guendouzi.

,,Það var mikilvægt fyrir mig að sanna það að ég væri með það sem til þarf eins fljótt og hægt er.“

,,Ég fékk tækifæri á undirbúningstímabilinu og tók það. Ég sannaði að ég gæti verið partur af þessu liði.“

,,Ég bjóst samt ekki við að spila svona mikið því ég veit að ég er hjá topp félagi með frábæra leikmenn innanborðs.“