„Langfjölbreyttasta serían hingað til. Sex atvinnumenn og sex mismunandi íþróttagreinar. Snjóbretti, golf, körfubolti og Crossfit er eitthvað sem aldrei hefur verið áður,“ segir Auðunn Blöndal á Vísir.is um nýjustu þáttaröðina af Atvinnumönnunum okkar sem fer í loftið á Stöð2 innan tíðar.

Auðunn er að framleiða þriðju þáttaröðina af þessum afar vinsælu og vönduðu þáttum.

Auðunn heimsækir góða gesti en þættirnir verða sex. Ólafía Þórunn Kristinsdóttir, Rúrik Gíslason, Sunna Tsunami, Martin Hermannsson, Halldór Helgason og Katrín Tanja Davíðsdóttir verða til umfjöllunar.

Auðunn fær oft viðmælendur sína til að tala um málefni sem þeir ræða ekki venjulega. Rúrik segir sögu sína á einlægan hátt og hvernig hann tók því að vera ekki í hópi íslenska landsliðsins, á Evrópumótinu árið 2016.

,,Ég fékk sms frá KSÍ að ég væri ekki í hópnum, ég man bara að ég fór inn í herbergi og gjörsamlega brotnaði niður,“ segir Rúrik í gæsahúðar stiklu sem birt var í dag.

Rúrik hefur fest sig í sessi í landsliðinu eftir þessi vonbrigði en stikluna má sjá hér að neðan.