Hlaðvarpsþátturinn, 90 mínútur hefur hafið göngu sína en um er að ræða þátt sem Hörður Snævar Jónsson, ritstjóri 433.is stýrir.
Rætt verður um fótbolta við áhugaverða gesti í vetur, farið verður um víðan völl.
Bjarni er þekktastur fyrir tíma sinn hjá Stoke City en hann lék með félaginu frá 2000 til 2003.
Er hann kom fyrst til félagsins þá var faðir hans, Guðjón Þórðarson, við stjórnvölin en Bjarni kom til liðsins frá Genk í Belgíu.
Það er ekki gefið að komast í liðið þó að pabbi þinn sé þjálfari og segir Bjarni að það hafi alls ekki verið létt.
,,Ég held að það sé mýta um það að þetta sé eitthvað létt, það er víðsfjarri, þetta tekur töluvert á bæði innan sem utan vallar,“ sagði Bjarni.
,,Þetta er samband sem er mjög sterkt en eins og með bræður þína þá er þetta þjálfari og ég er leikmaður.“
Bjarni var svo settur á sölulista hjá Stoke en honum var lofað launahækkun sem kom aldrei.
,,Það var í raun og veru aðstæður sem komu utan vallar á milli pabba og stjórnar. Þegar ég fer frá Belgíu til Stoke þá lækkaði ég aðeins í launum.“
,,Það átti svo að leiðrétta það þegar ég var búinn að sýna að ég ætti heima í liðinu. Það kom aldrei upp og það var pínu kergjótt á milli stjórnar og þjálfarans á þeim tíma.“
,,Ég óskaði eftir því að fara á sölulista í svona ákveðnu mótmælaskyni þar sem það var ekki verið að standa við það sem mér var lofað á þessum tíma en svo gerðist lítið úr því og ég spilaði áfram.“
,,Pabba er sagt upp þegar við komumst upp en þetta gekk svo allt vel.“