Ísak Bergmann Jóhannesson gekk í raðir IFK Norrköping á dögunum frá ÍA á Akranesi. Ísak er aðeins 15 ára gamall en faðir hans er Jóhannes Karl Guðjónsson fyrrum landsliðsmaður og þjálfari ÍA í dag.

Ísak er að slá í gegn í Svíþjóð en hann lék 90 mínútur með aðalliði félagsins í æfingaleik gegn SC Farense á Spáni í gær

Oliver Stefánsson sem einnig kom á sama tíma frá ÍA, kom inn sem varamaður í leiknum.

Sænskir fjölmiðlar hafa mikinn áhuga á málinu enda er Ísak ungur að árum en byrjaður að láta til sín taka. Jens Gustafsson, þjálfari liðsins býst við að hann fái tækifæri í alvöru leikjum á komandi tímabili.

,,Ísak er gjörsamlega frábær, hann er bara 15 ára og spilar fótboltann svona. Það er unun að vinna með svona leikmanni,“ sagði Gustafsson við sænska fjölmiðla.

,,Miðað við hvernig hann spilar leikinn þá getur hann fengið tækifæri með okkur í ár, hann tekur yfirleitt rétta ákvörðun. Það er ekki algengt á þessum aldri, við þurfum að vinna í styrknum hans og hann hefur ekki tekið út allan þroska.“

Eins og fyrr segir kom Ísak til Norrköping frá ÍA en Arnór Sigurðsson sem einnig er frá Akranesi var áður í herbúðum Norrköping. Hann var seldur til CSKA Moskvu á síðasta ári.

,,Frá árinu 2015 hefur Arnór verið sá maður sem ég lít upp til,“ sagði Ísak um málið.

,,Ég lít upp til hans og ræddi við hann áður en ég kom hingað, hann gat ekki sagt neitt slæmt. Hann sagði þetta vera frábæran stað. Fólkið í kringum félagið er frábært, borgin er góð. Ekki of stór, ekki of lítil. Þetta er fullkomið, leikmenn hafa tekið mér vel.“

Ísak var beðinn um að lýsa leikstílnum sínum. ,,Ég er fljótur að hugsa, ég les leikinn vel. Það voru mörg félög sem vildu fá mig en Norrköping var besti kosturnn fyrir ungan leikmann eins og mig.“