Hlaðvarpsþátturinn, 90 mínútur hefur hafið göngu sína en um er að ræða þátt sem Hörður Snævar Jónsson, ritstjóri 433.is stýrir.

Rætt verður um fótbolta við áhugaverða gesti í vetur, farið verður um víðan völl.

Gestur þáttarins að þessu sinni er Jóhann Berg Guðmundsson sem hefur verið einn besti knattspyrnumaður Íslands síðustu ár.

Jóhann hefur spilað í Championship-deildinni og ensku úrvalsdeildinni þar sem hann spilar með Burnley í dag.

Hann var áður á mála hjá Charlton í næst efstu deild og vakti athygli fyrir frammistöðu sína þar.

Hann segir að það sé klár munur á þessum deildum og fór aðeins yfir það í þættinum.

,,Munurinn er að ef þú gerir mistök í úrvalsdeildinni þá er þér bara refsað en þú kemst upp með meira í Championship,“ sagði Jóhann.

,,Í báðum deildum er mjög hátt tempó en samt ef þú gerir mistök í úrvalsdeildinni, það eru það góðir leikmenn að þér er refsað. Ef þú missir boltann á hættulegum stað þá er það líklega mark.“

,,Í Championship-deildinni eru ekki eins mikil gæði og þú kemst upp með fleiri mistök, ég held að það sé aðal munurinn. Það eru bara gæðin.“