Það verður brekka fyrir handboltalandsliðið á Heimsmeistaramótinu í dag þegar liðið mætir Frakklandi. Tveir bestu leikmenn liðsins verða fjarverandi vegna meiðsla. Aron Pálmarsson og Arnór Þór Gunnarsson verða ekki með.
Aron er besti handboltamaður Íslands og Arnór Þór hefur verið jafn besti leikmaður liðsins á mótinu.
Það verður því erfitt verkefni að mæta einu besta handboltalandsliði í heimi án þeirra. Aron Einar Gunnarsson, fyrirliði íslenska fótboltalandsliðsins hefur hins vegar boðið fram krafta sína.
Arnór Þór er einmitt bróðir Arons en Aron var mjög öflugur handboltamaður á sínum yngri árum. Hefði hann valið þá íþrótt eru allar líkur á að hann væri í þessu landsliði í dag.
Miðað við Twitter færslu Arons þá verður hann staddur í Köln í dag og hann býður fram krafta sína. ,,Ég tók skóna með til öryggis. Vantar í hóp?,“ skrifar Aron Einar.
Guðmundur Þ. Guðmundsson gæti gert margt vitlausara en að fá óskabarn þjóðarinnar, í hóp sinn í dag.
Eg tók skónna med til oryggis! Vantar i hóp?
— Aron Einar (@ronnimall) January 20, 2019
