Bræðurnir Aron Einar Gunnarsson og Arnór Þór Gunnarsson er íslenskum íþróttaáhugamönnum að góðu kunnir enda áberandi á sínu sviði. Aron Einar er einn af okkar fremstu knattspyrnumönnum og Arnór Þór Gunnarsson einn okkar fremsti handboltamaður og einn markahæsti leikmaður HM sem nú stendur yfir.

Athygli vekur að bæði Aron og Arnór leika í treyju númer sautján en fyrir því er gild ástæða. Móðir þeirra bræðra, Jóna Emilía Arnórsdóttir, segir frá því á skemmtilegan hátt í sunnudagsblaði Morgunblaðsins. Má ástæðuna rekja til húss á Ísafirði sem stendur við Fjarðarstræti og er götunúmer þess 17.

Afi og amma þeirra bræðra í móðurætt, Arnór Sigurðsson og Hulda Jónsdóttir, bjuggu lengi vel í umræddu húsi og ólst móðir þeirra, Emilía, upp í því að stórum hluta.

„Við vorum alltaf dugleg að heimsækja foreldra mína meðan þau voru á lífi og þegar strákarnir voru litlir bjuggum við einn vetur á Ísafirði, í sömu götu. Þeir tengja því báðir við húsið og það er ákaflega skemmtilegt að þeir hafi valið að vísa í það með þessum hætti. Arnór byrjaði á þessu, enda eldri, og Aron tók það síðan upp eftir honum. Þeim er greinilega annt um rætur sínar og við hugsum öll með hlýju til Ísafjarðar,“ segir Jóna í viðtalinu við Morgunblaðið en þar ræðir hún meðal annars um íþróttaiðkun sona sinna, þá einkum Arnórs sem verður í eldlínunni með Íslandi gegn Þjóðverjum á HM í kvöld klukkan 19.30.