Jamie Carragher, fyrrum leikmaður Liverpool, er mjög hrifinn af því sem Ole Gunnar Solskjær hefur gert hjá Manchester United.

United hefur unnið sex leiki í röð undir stjórn Solskjær en Paul Ince, fyrrum leikmaður liðsins, gerði lítið úr þessum árangri Norðmannsins.

Ince sagði í gær að hver sem er hefði getað tekið við af Jose Mourinho í desember og lagað gengi liðsins.

Carragher er þó alls ekki sammála þeim ummælum og svarar Ince fullum hálsi.

,,Það hefur mikið verið skrifað um Solskjær og að allt sé mjög, mjög jákvætt á yfirborðinu,“ sagði Carragher.

,,Ég held að margir hafi horft á stöðuna fyrir leikinn gegn Tottenham og hugsað ,,Allir gætu hafa tekið við og gert þetta“. Það er kjaftæði. Algjört kjaftæði.“

,,Hann hefur tekið stórar ákvarðanir með því að skilja leikmenn eftir – Romelu Lukaku kostaði 80 milljónir punda og hann er á bekknum. Þegar hann kemur inná þá hefur hann áhrif.“

,,Þú hugsar um Jose Mourinho og fólk segir að þessir leikir hafi verið auðveldir. Á síðustu leiktíð þegar United endaði í öðru sæti og komst í úrslit bikarsins þá tapaði Mourinho þrisvar fyrir nýliðum.“

,,Það er ekki auðvelt að valta yfir þessi lið. Solskjær hefur byrjað feril sinn þarna frábærlega.“