Chris Sutton, fyrrum leikmaður Celtic, fékk morðhótanir á dögunum eftir leik liðsins við Rangers.

Sutton skrifaði um leik Celtic fyrir the Daily Record og fór yfir nokkur viðkvæm mál sem fór illa í marga stuðningsmenn.

Það er mikill rígur á milli Celtic og Rangers í Skotlandi en Rangers hafði betur í leiknum í fyrsta sinn í langan tíma.

,,Ég fékk send einkaskilaboð og ég hef tekið á málinu eins og á að gera,“ sagði Sutton.

,,Þetta hefur verri áhrif á börnin mín og eiginkonu. Vonandi er þetta grín því annars verð ég ekki hérna eftir nokkrar vikur.“

,,Ég mun ekki breyta því hvernig ég er. Ég elska fótbolta og er með sterkar skoðanir, það er það sem við reynum að gera og sýna.“

,,Það er lína þarna og morðhótanir eru of mikið. Við getum ekki látið þessa hálfvita stöðva okkur í því sem við viljum segja.“