Guðni Bergsson, formaður KSÍ segir að ekki nein leiðindi séu á milli sambandsins og Heimis Hallgrímssonar, fyrrum þjálfara karlalandsliðsins.
Vísir.is sagði frá því á dögunum að deilur væru á milli KSÍ og Heimis er varðar bónusgreiðslur sem hann telur sig eiga inni.
Vísir sagði að málið snérist um milljónir króna en ágreiningurinn snýst um hvernig KSÍ og Heimir túlka samninginn sem hann hafði. Heimir lét af störfum eftir HM í Rússlandi. Lögfræðingur Heimis vinnur í málinu.
,,Það eru ekki nein illindi, alls ekki. Við erum góðir félagar og vinir, við Heimir,“ sagði Guðni í 90 mínútum, hlaðvarpsþætti okkar.
Oftar en ekki eru svona samningar gerðir upp eftir að móti lýkur en Heimir er enn án starfs, eftir að hafa hætt með landsliðið.
,,Það er oft verið að gera svona mál upp eftir á, það er verið að fara yfir það og klára það. Við erum að fara yfir samninginn og hvernig hann lítur út.“
,,Við erum að gera það í sátt“
Viðtalið við Guðna má heyra í heild hér að neðan.