Gylfi Þór Sigurðsson er besti knattspyrnumaður Íslands í dag, það geta flestir verið sammála um.
Gylfi er sá maður sem fjölmiðlar vilja ræða við hvað mest eftir leiki íslenska karlalandsliðsins og þarf oft að sitja fyrir svörum.
Okkar maður viðurkennir það þó að honum leiðist þau viðtöl og það að svara sömu spurningunum trekk í trekk.
Gylfi var í einkaviðtali við 433.is á dögunum og hafði þetta að segja.
„Ef ég á að segja alveg eins og er, þá finnst mér leiðinlegt í viðtölum. Skemmtilegast er að fara í viðtöl þegar ekki er verið að tala um fótbolta, heldur eitthvað allt annað,“ sagði Gylfi.
,,Þá þessi hefðbundnu viðtöl; hvernig mér hafi fundist leikurinn vera og hvernig stemmingin sé í hópnum. Ég vildi að ég væri að gera eitthvað allt annað.“
,,Ég þarf að mæta í flest viðtöl og reyna að gefa eitthvað af mér. Þegar maður er alltaf í þessum viðtölum þá verða svörin bara æfð. Maður fer bara í frasa sem maður man eftir.“
,,Ég veit ekki hvað ég hef fengið sömu spurninguna oft og þá er ég með svar á takteinum. Mér finnst skemmtilegt að fara í viðtöl sem eru bara um allt annað en fótbolta.“
,,Maður nennir ekki veseni og passar sig að segja ekki eitthvað sem gæti vakið hörð viðbrögð, sem einhverjir hafa eitthvað á móti. Mér var kennt í Reading að tala og viðtalstækni, að passa sig á hinu og þessu.“