Haraldur Björnsson markvörður Stjörnunnar segir frá skemmtilegri sögu í hlaðvarpsþætti félagsins, Inn með boltann.
Eiður Benedikt Eiríksson stýrir þættinum en Haraldur rifjar upp atvik frá árinu 2009 þegar hann var í marki Vals.
Atli Eðvaldsson var þjálfari liðsins og hann taldi að eitthvað amaði að sjón Haralds eftir mistök hans.
Haraldur hefur síðan þá farið í atvinnumennsku og komið heim, enginn hefur efast um sjón hans aftur.
„Við vorum að spila gegn KA í bikarnum, ég hafði tekið svona tuttugu fyrirgjafir í leiknum, svo kemur ein í seinni hálfleik sem ég missi. Þá er einhver á fjærstönginni sem skorar,“ sagði Haraldur við hlaðvarpsþátt Stjörnunnar.
„Við vinnum leikinn en Atli tekur mig út úr liðinu og sendir mig til augnlæknis. Ég var tvítugur og Atli hélt að það væri eitthvað að sjóninni minni, fyrst ég missti af einni fyrirgjöf.“
„Ég var sendur í Blindrafélagið í skoðun, það var mjög vandræðalegt. Þarna var kona að skoða mig og ég sá alla stafina, ég er með mjög góða sjón. Ég var samt bara á bekknum út tímabilið.“
