„Síminn getur staðfest orðróm síðustu daga um að Síminn og Enska úrvalsdeildin hafa náð samningum um sýningaréttinn frá Ensku úrvalsdeildinni í knattspyrnu frá og með tímabilinu 2019/2020. Gildir sýningarrétturinn út þrjú leiktímabil.“

Svona hófst tilkynning frá Símanum í gær þess efnis að fyrirtækið hafi tryggt sér sýningarréttinn á ensku úrvalsdeildinni frá og með næsta tímabili.

Þannig hefur Síminn yfirboðið Sýn sem bauð samkvæmt fréttum dagsins 1,1 milljarð fyrir að halda réttinum. Síminn bauð betur.

Stöð2 Sport hefur fjallað vel og ítarlega um ensku úrvalsdeildina. Gísli Marteinn Baldursson, sjónvarpsmaður á RÚV og áhugamaður um almennings samgöngur grætur þetta.

,,Ég segi það alveg eins og er að mér finnst leiðinlegt að enski boltinn sé á leiðinni frá Stöð2,“ skrifar Gísli á Twitter í dag.

Gísli segir að Síminn þurfi að gera ansi vel til að gæðin fyrir íslenka neytendur haldist eins.

,,Þau hafa gert þetta frábærlega og við aðdáendur PL höfum einfaldlega fengið frábæra þjónustu. Það ber að þakka fyrir það og Síminn má heita góður ef gæðin haldast þau sömu.“

Aðrar stærstu deildir heims verða áfram hjá Sýn en þar má nefna Meistaradeildina og spænsku deildina auk þess sem fyrirtækið er með íslenska fótboltann, körfuna og handboltann.

Ég segi það alveg eins og er að mér finnst leiðinlegt að enski boltinn sé á leiðinni frá Stöð2. Þau hafa gert þetta frábærlega og við aðdáendur PL höfum einfaldlega fengið frábæra þjónustu. Það ber að þakka fyrir það og Síminn má heita góður ef gæðin haldast þau sömu.

— Gísli Marteinn (@gislimarteinn) November 6, 2018