Jóhann Berg Guðmundsson hefur verið besti maður Burnley á þessu tímabili en liðið hefur hins vegar átt í vandræðum.

Jóhann hefur skorað tvö mörk og lagt upp fjögur í ensku úrvalsdeildinni en Burnley er við fallsvæðið.

,,Tímabilið er nýlega farið af stað, það er svekkjandi að við séum ekki að spila betur,“ sagði Jóhann Berg Guðmundsson.

,,Við spilum vel á köflum en ekki í 90 mínútur þessa stundina. Við verðum að fara út á æfingasvæði, gera það sem við getum þar og reyna að fá þrjú stig gegn Leiceste rum helgina.

Vörnin sem verið hefur sterkasta vopn Burnley míglekur um þessar mundir. ,,Ég veit ekki hvað er að, við fáum of mikið af mörkum á okkur, miðað við síðustu leiktíð. Ég veit ekki hvert vandamálið er, við verðum að laga það sem fyrst.“

,,Þetta er áhyggjuefni, venjulega verjumst við vel og skorum líka. Ef þú skorar tvö og færð á þig fjögur. Þá er það ekki gott.“

Jóhann var á skotskónum gegn West Ham um liðna helgi í 4-2 tapi en markið var afar snyrtilegt. ,,Þetta var gott mark, frábær bolti frá Ashley Westwood og ég kláraði vel. Ég er ánægður að skora en það telur ekkert.“