Tilboð upp á rúman milljarð króna, 1.100 milljónir, dugði ekki til að Sýn myndi tryggja sér áframhaldandi sýningarrétt af enska boltanum. Tilboði Símans var tekið eins og kunnugt er en tilboð þeirra var minnst tíu prósentum hærra. Þetta er fullyrt í Markaðnum í dag og vísar blaðið í heimildir sínar.

Útboðið var fyrir árin 2019 til 2022 og var það staðfest í gær að Síminn hefði tryggt sér réttinn. Í Markaðnum í dag kemur fram að útboðið hafi verið með þeim hætti að ef munur á tilboðum væri innan við tíu prósent færi útboðið í aðra umferð. Til þess kom ekki og virðist tilboð Símans því hafa verið minnst 110 milljónum króna hærra.

Sýn mat það svo að gert yrði hærra tilboð yrði tap á starfseminni. Björn Víglundsson, framkvæmdastjóri miðla Sýnar, sagði að áskrifendur enska boltans í gegnum Sýn væru á annan tug þúsunda. Ljóst sé að þeir sem gera tilboð líkt og Síminn gerði ætli sér að fá peningana til baka með einhverjum hætti. „Þannig að mikil samkeppni í svona útboði kemur sér illa fyrir neytendur á endanum.“

Markaðurinn hefur eftir Magnúsi Ragnarssyni, framkvæmdastjóra afþreyingarmiðla og sölu Símans, að enski boltinn hafi verið dýr hér á landi því fólk hefði þurft að kaupa mikið með honum. Við teljum að við getum selt réttinn stakan og þannig náð til fleiri heimila með ódýrari vöru.“