Hlaðvarpsþátturinn, 90 mínútur hefur hafið göngu sína en um er að ræða þátt sem Hörður Snævar Jónsson, ristjóri 433.is stýrir.

Rætt verður um fótbolta við áhugaverða gesti í vetur, farið verður um víðan völl.

Fyrsti gestur þáttarins er Freyr Alexandersson, aðstoðarþjálfari karlalandsliðsins og fyrrum þjálfari kvennalandsliðsins.

Freyr ræddi um ýmislegt í þættinum og á meðal annars tíma sinn hjá Val er hann aðstoðaði Kristján Guðmundsson á sínum tíma.

Aðdragandinn að því er ansi athyglisverður en það var mikið í gangi hjá félaginu áður en ráðning Kristjáns var staðfest.

,,Það var einn sirkusinn. Ég var hættur með kvennaliðið og átti að vera með Gulla Jóns með liðið,“ sagði Freyr.

,,Svo eru stjórnarskipti í Val og Gulli er rekinn. Þetta verður algjör kássa. Þetta er áður en stjórnarskiptin áttu sér stað. Svo koma þau eftir tímabilið og Stjáni er ráðinn.“

Kristján og Freyr þekktust ekki neitt áður en þeir byrjuðu að vinna saman sem gerði hlutina enn skrítnari að hans sögn.

,,Ég var búinn að handsala samning um að verða aðstoðarþjálfari áður en Stjáni kemur inn. Ég þekkti hann ekki neitt en vissi hver hann var. Þetta var mjög skrítið.“

,,Fyrsti fundurinn með Stjána, eins og Stjáni er, það var eitt það skrítnasta sem ég hef upplifað á ævinni.“

,,Ég vissi ekkert út í hvað ég var kominn. Ég hefði enn getað bakkað úr þessu en svo ákveð ég að hitta hann aftur.“

,,Svo á seinni fundinum var hann búinn að mæla mig út og ég hann og þá fann ég að þetta væri að klikka. 2011 tímabilið okkar það var frábært samstarf og við vorum á góðu runni.“

,,Við vorum á toppnum í deildinni eftir 12 umferðir. Varnarleikurinn var frábær og góð holning og liðsheild í gangi.“

,,Svo gerist ýmislegt í klúbbnum á þessum tíma og umhverfið verður erfitt. Það voru stjórnarskipti og vorum að skipta rosa mörgum leikmönnum. Við náðum að búa til geggjaða liðsheild og þetta var gaman en svo fjaraði undan þessu.“

,,Árið 2012 þá vorum við í vandræðum. Við vorum komnir í vond samskipti við stjórn og það endaði þannig að við þurftum báðir að hætta. Við vorum ekki reknir eða neitt þannig.“

,,Ég man að ég átti hörku rifrildi við stjórnina sem ég sé geðveikt eftir í dag. Ég fór í etthvað viðtal eftir og lét þá heyra það, þvílíkur vitleysingur.“

,,Ég sé ennþá eftir því. Ég vann lengi með þessum mönnum og þetta eru svo góðir menn. Þetta eru eldhugar.“