Það eru yfirleitt líflegar umræður þegar Mikael Nikulásson og Kristján Óli Sigurðsson setjast fyrir framan hljóðnemann í Dr. Football. Um er að ræða hlaðvarpsþátt sem Hjörvar Hafliðason stýrir en í nýjasta þættinum var rætt um Ísland og Sviss á mánudag.

Þar tapaði Ísland 1-2 en íslenska A-landsliðið hefur ekki unnið leik í rúmt ár, margir hafa áhyggjur en aðrir telja að góðir tímar komi á næstunni.

,,Menn eru komnir undir skel og farnir að tala um að þetta sé gott, menn eru hræddir,“ sagði Mikael í þættinum og var svekktur með það hvernig rætt var eftir leik.

Íslenska liðið spilaði vel undir lok leiksins en af hverju kom það ekki fyrr?

,,Við vorum frábærir eftir að Alfreð skoraði þetta frábæra mark, við vorum frábærir síðustu fimmtán mínúturnar, af hverju kom þetta ekki fyrr? Við vorum með fínan stuðning.“

Mikael var ánægður með reyndari menn liðsins og hvernig þeir töluðu eftir leik en gagnrýndi aðra.

,,Ég sá reyndustu mennina í liðinu, Alfreð, Jóhann Berg og Gylfi sem koma og segja að þetta sé ekki nógu gott. Ég tók sérstaklega eftir því hjá Alfreð, það var ekki þannig samkvæmt þjálfurunum og öðrum.“

Þátturinn er hér að neðan.