Það er staðreynd að jólin nálgast óðfluga og verslanir eru þegar byrjaðar að stilla upp margvíslegum jólavarningi. Einnig hafa borist óstaðfestar fregnir af jólalagi í spilun á Léttbylgjunni. Það getur tekið langan tíma að panta vörur af netinu og það er ekki eftir neinu að bíða miðað við sívaxandi raðir á pósthúsum landsins í aðdraganda jóla. Eins og sumir hafa lent í er ansi glatað að fá jólagjafir eða sniðugu möndlugjöfina í hús um miðjan janúar.

Fjölskylduhefðir í tengslum við jólin eru jafn fjölbreyttar og fjölskyldurnar eru margar, ein nýjasta hefðin eru eins jólanáttföt fyrir alla fjölskylduna; yndislega hallærisleg, Instagramvæn og mjúk til að klæðast á meðan það er verið að skreyta jólatréð. Bleikt tók saman nokkra staði þar sem er hægt að verða sér út um slík náttföt og gerði lauslega verðkönnun.

Það er að sjálfsögðu allt morandi í jólanáttfötum á AliExpress. Þar á meðal annars finna þessi dýrindislegu jólanáttföt með jólatrjám. Fyrir þriggja manna fjölskyldu kostar settið 48 dollara, eða 5.500 krónur fyrir toll.

Hjá Etsy er hægt að fá þessar elg-jólapeysur fyrir par á 52 dollara, eða 5.900 krónur fyrir toll.

Vefverslunin PatPat lofar að þessi föt séu á tilboði og segir í auglýsingum að settið kosti aðeins 19,99 dollara fyrir fjölskylduna. Þegar vörurnar eru svo settar í körfu og sendingarkostnaður bætist við kemur í ljós að heildarkostnaðurinn fyrir þriggja manna fjölskyldu er að nálgast 12.000 krónur og það fyrir toll.

Fyrir þá sem ætla í Primark fyrir jólin þá kosta náttfötin á bilinu 10 til 12 pund fyrir fullorðna og allt niður í 7 pund fyrir börn. Það þýðir að náttfötin kosta rúmlega 4.000 krónur með sendingarkostnaði fyrir toll.