Margir hafa áhyggjur af því hvernig komið er fyrir mætingunni á Pepsi deild karla, enn eitt árið stefnir í það að mætingin fari niður á við.

Félögin hafa reynt að gera sitt besta til að bæta umgjörðina en það hefur engu skilað. Íslenskur toppfótbolti vill sjá meira um deildina og taka það verkefni úr höndum KSÍ.

Benedikt Bóas Hinriksson blaðamaður á Fréttablaðinu mætti í Harmageddon í dag að ræða þetta

,,KSÍ hefur ekki áhuga á Pepsi deildinni,“ sagði Benedikt Bóas í Harmageddon.

Benedikt telur að KSÍ hafi ekki tíma fyrir deildarkeppni á Íslandi, öll einbeiting sé á A-landsliðinu.

,,Þetta bákn niðri í Laugardal, sinnir A-landsliði karla. Þar komast 90 prósent af tekjum, þeir eru búnir að gleyma því að hér sé spilaður fótbolti á sumrin.“

,,Það var hrun í mætingu í fyrra, það var fyrsta sumarið þar sem það kostaði 2 þúsund krónur inn, fleira og fleira. KSÍ stofnaði starfshóp um að þessu ætti að taka á, það er níu mánaða bið eftir tímabilinu. Það er nægur tími, er það ekki?.“

Íslenskur toppfótbolti, hagsmunarsamtök liða í tveimur efstu deildum vill fá verkefnið frá KSÍ að sjá um deildina.

,,Íslenskur toppfótbolti er búið að grátbiðja að fá mótið í sínar hendur, það er HM ár. KSÍ er upptekið við það, trúlega er það skiljanlegt. Það er skiljanlegt að allir starfsmenn séu á HM, þar sem eru 20 starfsmenn. Íslenskur toppfótbolti sem eru 24 stærstu lið landsins, þeir vilja fá mótið. Að þeir geti skipulagt mótið og séð um markaðsefnið, það var reynt í fyrra en það er fullreynt núna að KSÍ komi eitthvað að þessu. Það verður allt brjálað á ársþingi KSÍ í febrúar.“

Viðtalið er í heild hér að neðan.