Djibril Cisse, fyrrum leikmaður Liverpool, hefur greint frá því hvað Steven Gerrard sagði við leikmenn liðsins í hálfleik í úrslitum Meistaradeildarinnar árið 2005.

Liverpool var 3-0 undir gegn AC Milan í hálfleik en kom ótrúlega til baka í síðari hálfleik og jafnaði metin. Liðið vann svo að lokum í vítakeppni.

Cisse segir að hann muni aldrei gleyma því sem Gerrard sagði við leikmenn í leikhléi.

,,Stevie stendur upp og segir að Liverpool sé það eina sem skipti hann máli,” sagði Cisse.

,,Þetta er hans félag, það eina sem hann þekkir og hann vildi ekki vera hlátursefni í sögu Meistaradeildarinnar.”

,,Hann segir við okkur að ef við virðum hann og elskum sem fyrirliða þá þurfum við að setja okkur í stand og koma okkur aftur inn í leikinn.”

,,Hann skoraði fyrsta markið og vann svo vítaspyrnuna. Hann átti ótrúlegan seinni hálfleik og kláraði leikinn í bakverði.”

,,Hann átti klikkaðan leik en ég mun aldrei gleyma þessari hálfleiksræðu.”