Knattspyrnuáhugafólk var nokkuð hissa að sjá þegar Kolbeinn Sigþórsson var að nýju valinn í íslenska landsliðshópinn í knattspyrnu nú á dögunum. Þessi magnaði framherji hefur ekki spilað mikið af fótbolta í rúm tvö ár.

Kolbeinn hefur glímt við meiðsli nánast frá því að Evrópumótinu í Frakklandi lauk sumarið 2016. Það horfir hins vegar til betri vegar, Kolbeinn hefur getað æft síðustu mánuði. Það sem er þó verra er að franska liðið, Nantes sem á Kolbein hefur ekki áhuga á að nota hann.

„Heilsan er mjög góð. Búinn að vera heill núna nánast í átta mánuði fyrir utan í mars og apríl, þannig að þetta er búið að líta vel út og gömlu meiðslin ekki búin að trufla mig,“ sagði Kolbeinn við Guðmund Benediktsson á Stöð2 fyrir komandi landsleiki.

Franska liðið Nantes vildi losna við Kolbein í sumar og nokkur lið sýndu áhuga en það gekk ekki í gegn. Félagaskiptaglugginn er lokaður núna og því er staða framherjans erfið

„Þegar ég kom aftur til baka í sumar þá tilkynntu þeir mér það að ég mætti fara, finna mér nýtt lið. Staðan hefur verið þannig síðustu tvo mánuði að ég hef verið að leita mér að liði. En ég er ekki búinn að spila í að verða tvö ár svo það er erfitt að finna lið sem vill gambla á mig.“

Erik Hamren sem tók við íslenska landsliðinu á dögunum ætlar að nýta Kolbein sem varamann, tölfræði hans með íslenska landsliðinu er slík að það gæti borgað sig. Kolbeinn hefur skorað 22 mörk í 44 landsleikjum. Mögnuð tölfræði.

,,Ég tilkynnti honum það að ég væri ekki í leikformi og ekki búinn að spila, eins og hann vissi. Hann spurði mig hvort ég gæti spilað 15-20 mínútur og gæti notað reynslu mína í það. Ég tel mig vera það, þó ég sé kannski ekki í leikformi,“ sagði Kolbeinn en viðtalið má sjá hérna.