Paul Pogba, leikmaður Manchester United, hefur verið á milli tannanna á fólki undanfarið en hann er sagður vilja komast burt.

Pogba hefur vakið athygli fjölmiðla bæði fyrir Instagram færslu sem hann birti eftir 2-1 sigur á Leicester og ummæli sem hann lét falla á dögunum.

Pogba sagðist þar ekki mega segja allt sem hann vildi því ef hann gerði það þá yrði honum refsað af félaginu.

Paul Ince, fyrrum leikmaður United, segir að það sé algjör martröð fyrir Jose Mourinho að vinna með Pogba þessa dagana.

,,Síðan hann kom aftur þá hefur hann verið algjör martröð,“ sagði Ince um leikmanninn.

,,Sem leikmaður, sama þótt þú sért ánægður eða ekki þá áttu að haga þér á ákveðinn hátt.“

,,Ef hann væri í svona litlum metum hjá Jose þá efast ég um að hann myndi gefa honum fyrirliðabandið.“

,,Hann átti frábæran leik og sýndi frammistöðu fyrirliða en enginn er að tala um það því það er talað um það sem gerist utan vallar.“

,,Ég veit ekki af hverju hann er að tala við fjölmiðla og sýna félaginu óvirðingu. Hann brást sjálfum sér.“

,,Hann þarf að tala um liðið og frammistöðuna, frekar en um sjálfan sig. Ef hann er svona ákveðinn í því að fara þá ætti hann að gera það.“