Albert Guðmundsson skrifaði í dag undir samning við lið AZ Alkmaar í Hollandi en félagið staðfesti það nú rétt í þessu.

Albert gerir fjögurra ára samning við AZ en hann hefur undanfarin þrjú ár verið á mála hjá PSV Eindhoven.

Tækifærin voru þó af skornum skammti í aðalliðinu og vildi Albert fara í nýtt lið þar sem hann myndi spila stærra hlutverk.

Jóhann Berg Guðmundsson, leikmaður Burnley, sendi Alberti kveðju í dag eftir undirskriftina.

Jói Berg þekkir hollenska félagið vel en hann spilaði þar í fimm ár við góðan orðstír áður en hann gekk í raðir Charlton.

,,Þetta er frábært félag með frábæra stuðningsmenn og ég veit að þú munt njóta þess að spila fótbolta þarna,“ sagði Jói á meðal annars.

,,Ég veit að stuðningsmennirnir munu hafa gaman að því að horfa á þig spila fótbolta því ég veit að þú ert frábær leikmaður.“

,,Ég get ekki beðið eftir því að sjá leiki með liðinu, það var kominn tími á að íslenskur leikmaður myndi spila fyrir aðalliðið þar aftur.“