Heimir Hallgrímsson segir að hitinn sem verður í Volgograd á morgun, þegar leikur Íslands og Nígeríu fer fram á heimsmeistaramótinu, henti eflaust Nígeríu betur en Íslandi.

Mjög heitt er í veðri í Volgograd í dag og er hitinn um 32 gráður þegar þetta er skrifað. Veðurspár gera ráð fyrir því að hitinn á morgun geti farið upp í allt að 34 gráður. Leikur Íslands og Nígeríu hefst klukkan 18 að staðartíma en ekki er búist við því að hitinn þá verði kominn mikið niður fyrir 30 gráðurnar.

Heimir var spurður út í þetta á blaðamannafundi landsliðsins í morgun.

„Við spiluðum í miklum hita gegn Argentínu, ég veit að það spáir meiri hita. Líklega hentar það Nígeríu betur en okkur að spila í svona hita. Við munum taka það til umhugsunar þegar við setjum okkar plan. Það gera það allir í 30 gráðu hita, við erum ekkert öðruvísi,“ sagði Heimir Hallgrímsson.