Eitthvað uppnám virðist vera í herbúðum króatíska landsliðsins sem mætir því íslenska í lokaleik okkar riðils í Rostov eftir rúma viku. Nikola Kalinoc, framherji AC Milan, hefur verið sendur heim eftir að hafa neitað að koma inn á sem varamaður gegn Nígeríu í fyrrakvöld.

Kalinic, sem á að baki 41 landsleik og 15 mörk, átti að koma inn á undir lok leiksins gegn Nígeríu en neitaði. Þetta hefur nú kostað það að þjálfari Króata, Zlatko Dalic, hefur ákveðið að senda leikmanninn heim.

Króatíska knattspyrnusambandið hefur ekki staðfest tíðindin en talið er að það verði gert á blaðamannafundi í dag. Þetta mun gera það að verkum að aðeins ein hreinræktuð nía er í hópi Króata, Mario Mandzukic, leikmaður Juventus. Króatar unnu Nígeríu og eru á toppi riðilsins. Þeir geta tryggt sér sæti í 16-liða úrslitum með sigri á Argentínu á föstudag.