Íslenska karlalandsliðið spilaði sinn fyrsta leik á HM í Rússlandi í dag en liðið mætti stórliði Argentínu.

Strákarnir okkar voru frábærir í sínum fyrsta leik á HM í sögunni og náðu í stig gegn stjörnuprýddu liði Argentínumanna.

Sergio Aguero kom Argentínu yfir í þessum leik en Alfreð Finnbogason jafnaði aðeins fimm mínútum síðar.

Hér má sjá það góða og slæma úr leiknum.

Plús:

Strákarnir voru gjörsamlega GEGGJAÐIR í þessum leik. Eins og oft áður berjast þeir fyrir hvorn annan og við spilum eins og einn risavaxinn leikmaður.

Lionel Messi er besti leikmaður Argentínu, það er alveg á hreinu. Hann var eltur út um allt í þessum leik og var ekki upp á sitt besta. Vonandi er hann pirraður.

Hannes Þór Halldórsson varði vítaspyrnu frá Lionel Messi í þessum leik. Ég þarf ekkert að fara frekar yfir það. Hann varði vítaspyrnu frá Lionel Messi.

Við vorum miklu minna með boltann en áttum ekki mikið færri færi en Argentínumenn. Sköpuðu mjög lítið gegn þessu stórkostlega liði.

Fólk verður að gera sér grein fyrir því hversu margir hæfileikaríkir leikmenn eru í þessu liði Argentínu. Við fengum á okkur eitt mark gegn þessu liði. Eitt.

Við erum STÓRKOSTLEGT lið. Mér er ALVEG sama hvað Argentína er mikið með boltann. Það eru mörkin sem telja.

Ég er orðinn mikill aðdáandi dómarans sem dæmdi þennan leik. Var frábær.

Mínus:

Það er ekkert vont hægt að segja um spilamennsku okkar manna. Að ná jafntefli gegn Argentínu í FYRSTA LEIK Á HM er bara æðislegt

Víkingaklappið hefur oft verið betra en í þessum leik en það er ekki okkur að kenna. Við kennum vellinum um það.

Það eina sem við verðum að passa okkur á eru þessar vítaspyrnur. Fengum á okkur fleiri en eitt á EM. Megum ekki láta það sama gerast á HM.