Íslandsvinurinn og leikarinn John Travolta hefur tjáð sig um undarlega kenningu sem deilt er meðal aðdáenda söngvamyndarinnar Grease. Myndin ástsæla fagnaði nýverið 40 ára afmæli sínu og notuðu margir tækifærið til að rifja upp kynni sín við Sandy, Danny og alla hina.

Engar stórar kvikmyndir eru án kenninga, sumar misfurðulegar, ein kenning varðandi Grease snýr að Sandy og að hún sé í raun draugur. Kenningin byggir að stóru leyti á línu sem Danny syngur í laginu Summer nights um að hann hafi rétt svo bjargað henni frá drukknun.

Samkvæmt kenningunni þá dó Sandy, eða fór í dá, sumarið sem hún kynntist Danny og hafi svo dreymt að hafa farið í menntaskólann. Það að menntaskólinn sé í eftirlífinu, eða draumur, í lokin, þegar hún keyrir í burtu með Danny upp í skýin, þá sé Sandy á leið inn í eilífðina.

Travolta var alveg tilbúinn að ræða kenninguna í viðtali við USA Today: „Ég elska þetta. Ímyndunarafl fólks er alveg stórkostlegt,“ sagði Travolta og bætti við: „Svona kenningar fylgja svona tímalausum hlutum [eins og Grease]. Þetta er mjög skemmtilegt.“

Varðandi línuna sem hann söng í Summer nights, segir Travolta að þetta sé bara Danny að monta sig: „Hann var að monta sig. Hann bjó þetta til að gera sig stóran fyrir framan strákana. Sandy og Danny eru að segja tvær mismunandi útgáfur af sömu sögunni og annað hvort þeirra er að ýkja. Það er líklegast Danny.“

Travolta fullvissaði aðdáendur myndarinnar að Sandy sé ekki dáin. „Ég gæti alveg skemmt mér við að halda kenningunni á lofti, en ég þekki þá sem skrifuðu Grease, ég var þarna á sínum tíma. Ég get ekki tekið undir þetta.“

Þó að Sandy og Danny hafi ekki fengið framhaldsmynd þá er Travolta viss um hvernig saga þeirra endar: „Ég held að þau hafi eignast nokkur börn, eins og fólk gerði á þessum tíma. Börn sem þau elskuðu og dáðu. Þau elskuðu hvort annað og héldu í rómantíkina. Sandy og Danny voru alvöru.“