Tottenham gerði ekki bara út um vonir sínar á því að verða Englandsmeistarar þegar þeir gerðu 2-2 jafntefli við Chelsea á Stamford Bridge í gærkvöldi heldur setti liðið einnig nýtt met.

Níu leikmenn Tottenham fengu gult spjald en engu liði í sögu ensku úrvalsdeildarinnar hefur tekist að fá jafn mörg gul spjöld í einum og sama leiknum. Það er í raun ótrúlegt að Mark Clattenburg, dómari leiksins, hafi ekki lyft rauða spjaldinu, en alls fóru tólf gul spjöld á loft.

Spjaldaveislan hófst ekki fyrr en á 27. mínútu þegar Kyle Walker fékk fyrsta gula spjaldið. Næstur var Jan Verthongen og á 45. mínútu fengu Danny Rose og Willian áminningu. Erik Lamela fékk gult spjald á 51. mínútu og Christian Eriksen fékk áminningu á 70. mínútu. Branislav Ivanovic fékk gult mínútu síðar og undir lok leiksins fengu hvorki fleiri né færri en fimm leikmenn áminningu.

Fyrstir voru þeir Eric Dier og John Obi Mikel og þegar komið var fram í uppbótartíma fengu þeir Harry Kane, Mousa Dembele og Ryan Mason gult spjald. Samtals fóru því tólf gul spjöld á loft í leiknum.

Búast má við því að Tottenham fái háa sekt vegna ósæmilegrar hegðunar leikmanna liðsins í gærkvöldi.