Aron Pálmarsson, landsliðsmaður í handbolta og leikmaður Vezprém í Ungverjalandi, lét uppeldisfélag sitt, FH, heyra það á Twitter í gærkvöldi eftir að liðið tapaði fyrir Aftureldingu í 8-liða úrslitum Olísdeildar karla í handbolta.

Með tapinu í gærkvöldi er FH komið í sumarfrí en Afturelding komið í undanúrslit. FH endaði í sjötta sæti deildakeppninnar og varð til að mynda tuttugu stigum á eftir deildarmeisturunum og erkifjendunum í Haukum.

Aron, sem varð bikarmeistari með liði sínu í Ungverjalandi í gær, lét að sér kveða á Twitter í gærkvöldi þar sem hann sakaði FH liðið um áhugamennsku. Þá setti hann stórt spurningamerki við þjálfara liðsins, Halldór Jóhann Sigfússon. Hér að neðan má sjá færslur Arons á Twitter.