Knattspyrnusamband Marokkó hefur sent frá sér yfirlýsingu eftir að landinu var dæmdur sigur í Afríkukeppninni 2026.

Afríska knattspyrnusambandið ákvað að svipta Senegal sigrinum í úrslitaleiknum gegn Marokkó, þar sem liðið yfirgaf völlinn undir lok leiks án leyfis dómara. Er liðið talið hafa gefið leikinn með því, en niðurstaða þessi lá fyrir fyrr í vikunni.

Marokkó fær því titilinn. Knattspyrnusamband landsins fagnar niðurstöðunni og segir hana staðfesta mikilvægi þess að fylgja reglum keppninnar, en Marokkó hafði kært úrslitin, sem áfrýjunarnefnd afríska knattspyrnusambandsins tók svo til greina.

Í yfirlýsingu kom fram að markmið þeirra hafi aldrei verið að gera lítið úr frammistöðu liðanna heldur einungis að tryggja að reglur væru virtar.

Senegal ætlar að áfrýja niðurstöðunni til íþróttadómstóla.