Stjörnumenn fengu rasskell, 0-4, gegn KR í undanúrslitum Lengjubikars karla á laugardag.

Stjarnan sá aldrei til sólar í leiknum og á sama tíma voru KR-ingar frábærir. Þetta var til umræðu í hlaðvarpsþættinum Dr. Football.

„Menn í Garðabænum eru bara í nettu áfalli. Menn eru spenntir fyrir þessu liði og það er búið að leggja mikið í þetta. Svo kemur þetta,“ sagði Jóhann Már Helgason þar, en lið Stjörnunnar hafði verið sjóðheitt á undirbúningstímabilinu fram að þessu.

Stjarnan náði Evrópusæti í fyrra og voru í toppbaráttu við Víking um stutt skeið. Þrátt fyrir það flýgur sú saga að Jökull Elísabetarson þjálfari sé valtur í sessi nú þegar tæpur mánuður er í mót, eftir því sem Jóhann segir.

„Þeir voru mjög takmarkaðir í fyrra. Þeir slysuðust inn í toppbaráttuna. Ef þetta verður áframhald af þessu, maður hefur heyrt að Jökull sé á þunnum ís komandi inn í mótið,“ sagði hann og Sigurður Gísli Bond tók undir.

„Ég held hann sé í heitasta sætinu,“ sagði Sigurður, og á þar við samanborið við aðra þjálfara í Bestu deild karla.