Í Egyptalandi búa um 120 milljónir manna og í höfuðborginni Kaíró einni saman um 23 milljónir. Til samanburðar er íbúafjöldi Liverpool-borgar rétt undir einni milljón. Þegar maður gerir sér grein fyrir þessu verður auðveldara að skilja hvers vegna reiðin blossaði upp víðs vegar um landið þegar Mohamed Salah gaf umdeilt viðtal 6. desember og sakaði Liverpool um að hafa „kastað sér undir rútuna“.
„Þetta viðtal var eins og bylting í Egyptalandi,“ segir Diaa El-Sayed, fyrrverandi aðstoðarþjálfari egypska landsliðsins, sem hefur þekkt Salah síðan hann var 16 ára.
„99 prósent Egypta styðja Salah og við sáum líka á Anfield að stuðningsmenn Liverpool standa með honum.“
Í breskum fjölmiðlum var Salah hins vegar gagnrýndur harkalega. Jamie Carragher, fyrrverandi varnarmaður Liverpool, kallaði viðtalið „skömm“ og sakaði 33 ára Egyptann um að kasta félaginu undir rútuna. Aðrir töldu hann ranglega hafa loftað óánægju sinni opinberlega.
Í Kaíró er hins vegar allt annað uppi á teningnum. Þar getur „egypski konungurinn“ varla gert neitt rangt. „Áður en Salah kom studdi enginn Liverpool hér,“ segir Noura Essam, íbúi í Kaíró.
„Við áttum enga alþjóðlega fyrirmynd. Þess vegna munum við alltaf styðja Salah.“
Í forsetakosningunum í Egyptalandi árið 2018 strikuðu meira en ein milljón kjósenda út nöfn frambjóðendanna og skrifuðu nafn Salah á kjörseðilinn.
