Mikel Arteta, stjóri Arsenal, hefur fulla trú á að það muni kvikna á Viktor Gyokeres, sem var keyptur til félagsins frá Sporting í sumar, þrátt fyrir erfitt gengi og meiðsli undanfarið.

„Leikmaðurinn þarf að aðlagast öðruvísi uppstillingu. Við verðum að koma honum í bestu mögulegu stöðurnar svo hann geti sprungið út og náð að sína sitt besta,“ sagði Arteta á blaðamannafundi í dag.

„Það er líka mikilvægt að hann nái vel saman við aðra leikmenn. Áður en hann meiddist var hann á frábærum stað. Mörkin munu koma og við verðum mjög ánægð með hann.“

Miklar vonir voru bundnar við Gyokeres þegar Arsenal keypti hann í sumar og er mikilvægt fyrir félagið að fá hann í gang sem fyrst, en liðið er í hörkutitilbaráttu í ensku úrvalsdeildinni.